Karya : Abu Akrom

Raun tempe musim lebaran
Nasi pindang leq Buaran
Lamun mele irup aman
Mesti seimbang kebutuhan

Lemaq side ojoq Ampenan
Tuan Harapandi saq dampingi
Araq due macam kebutuhan
Kebutuhan jasmani dait rohani

Leq bulan haji tebedait
Langan bawaq kadu dile malem
Kebutuhan jasmani terkait
Kebutuhan awaq maraq mangan nginem

Wiq bian Amaq Rari Amit
Dengan rajin boyaq gabah
Kebutuhan rohani terkait
Kebutuhan batin maraq zikrullah

Siwaq benang leq atas bare
Dendeq inget brembe ruwe
Silaq seimbang irup leq dunie
Adeq selamet jiwa dait rage

Bekasi, 17 Sya’ban 1446 H/16 Februari 2025 M