TAUSHIAH BAHASA SASAK (1) PACU-PACU NTAN IRUP

banner post atas

Oleh : Abu Akrom

Semeton jari tiang saq tiang hormati.

Irup leq dunia niki sanget semendaq, selapuq umat manusie pastin uleq ojoq balen saq asli yesenuq akhirat. Dendeq sampe gare-gare urusan kesibukan leq dunia niki, akhir lupaq urusan saq sangat penting yesenuq persiapan teulek ojoq akhirat. Silaq te pade sadar, bukaq ate bukaq pikiran. Tekadu ate saq araq leq ite pade untuk fokus pekuat iman dait taqwa, dait tekadu pikiran isiq pandangan saq cerdas. Pikiran saq cerdas niki yesenuq pikiran saq maju dalam bidang-bidang saq kenaq. Lamun bedoe ate saq penoq isiq iman dait taqwa, in sya Allah aten pade jari bersih ndeq araq penyakit ate saq bahaye maraq talon ate, melen menang mesaq (sombong), ate gedeq, muraq sili dait lain-lain. Dait endah lamun bedoe pikiran saq cerdas, pastin gunean akal niki untuk hal-hal saq jauq keamaslahatan ite pade dait umat saq araq leq sekitar.

Iklan

Oleh karena irup niki araq semendaq, teapacu-pacu ntan jari manusie. Dendeq piyaq hal-hal saq ndeq kenaq baik leq dalam keluarge, tetangge, masyarakat dait taoq saq lain. Temilu ape saq sampun temanikan isiq Allah Ta’ala dalam Al Quran dait temilu ape saq sampun tesabdean isiq Rasulullah Shallallahu ‘Alaihi Wasallam dalem hadits beliau. Lamun tetu-tetu ntan jauq diriq sesuai ajaran Allah dait Rasul, pasti tejamin ndeq pade sesat dalam kelampan irup mbe-mbe taoq ndot. Maraq sabde Nabi dalam hadits saq sampun tewikan:

تَرَكْتُ فِيْكُمْ أَمْرَيْنِ لَنْ تَضِلُّوْا مَا تَمَسَّكْتُمْ بِهِمَا : كِتَابَ اللهِ وَ سُنَّةَ رَسُوْلِهِ

“Aku tinggalan ojoq kamu selapuq due pusake, ndeq pade sesat (salaq langan) selamen ngentiq kuat-kuat due pusake niki: yesenuq kitab Allah (Al Quran) dait sunnah Rasul (Hadits)” (HR. Al Hakim)

BACA JUGA  40 Pelajaran dari Akhlak Nabi SAW

Dalem Islam mestin tegaweq amalan prioritas bilang jelo maraq ngaji dait sembahyang. Dendeq pade meles-males ngaji dait sembahyang lime waktu sejelo semalem. Lamun te rajin ngaji ojok pare ustadz/tuan guru, pasti kenaq ntan jauq diriq dalam ate, pikiran dait kelanpan awaq, karena selapuq pengajian niki isin mengenai ajaran saq solah sesuai ajaran Islam. Dait endah lamun te rajin sembahyang lime waktu apalagi teromboq isiq sembahyang sunnah, pastin aten tenang, irup te solah dait tecegah oleq peagawain sak fahsya’ dait mungkar. Pegawain saq fahsya’ niki pegawean lenge saq ngerugian ite mesaq maraq zine, sedang mungkar pegawean lenge saq ngerugian dengan lain maraq maling, ngerampok dait lain-lain.

Lamun mele sempurne amal kebaikan leq dunie niki, ndeq cukup isiq ngaji bareng sembahyang doang, teromboq isiq puase, puase wajib dait endah puase sunnah. Lamun rajin ngaji, sembahyang dait puase, in Sya Allah ye jari langan becat tame surge, maraq syair lagu saq sampun tekarang isiq ulama’ bleq, waliyullah dait Pahlawan Nasional RI asal Lombok NTB, Maulana Syaikh TGKH. Muhammad Zainuddin Abdul Madjid, Al Fansyaury wal Anfenany, Al Masyhur:

Inaq amaqku
Semeton jarinku pade
Ndeq araq ite
Gen kekel leq dunie

Dakaq te sugih
Dakaqte bangse mulie
Ndeq araq gune
Mun ndeq araq agame

Pacu Gamaqne
Ngaji sembahyang puase
Mudahan gamaq
ite pade tame sorge

Semeton jari tiang saq tiang hormati.

Lamun te indeng-indeng syair lagu Maulana Sayikh niki, sangat simple, sederhane dait muraq gati tame surge. Saq penting rajin ngaji, sembahyang dait puase, in sya Allah ite pade selapuq tame surge. Ndeq araq gune timaq bedoe bande sugih isiq kepeng benang, dait timaq tejari keturnan bangse mulie (keturunan datu dahe, raje dait bangsawan) lamun daraq agame (ndeq wah ngaji, sembahyang, puase dait amalan-amala bagus saq lain). Sangkaq silaq tepade isiq irup saq semendaq niki isiq amalan sak solah, teperiri sikap pegawean dait carente ngeraos, dendeq sampe nyedaq hubungan ojoq sesame manusie isiq pegawean saq ndeq kenaq (jahat) dait tebagusan selapuq ritual ibadah saq sampun tewajiban isiq syari’at agame Islam, adeq saq selamet leq dunie dait leq akhirat.

BACA JUGA  Hikmah Pagi : Kiat Meraih Surga Bersama Keluarga Mewujudkan Qurrata A’yun pada Ananda

Entah niki juluq semeton jarin tiang selapuq sekedar taushiyah saq sanget sederhane, mudah-mudahan araq gune dait manfaat. Lamun araq tutur kate saq lenge, tiang nunas maaf bleq-bleq, in sya Allah leq lain waktu tesambung maliq nggih.

Bekasi, 28 Jumadil Awwal 1442 H/12 Januari 2021 M